Nə yaxşı doğmusan məni, ay Ana!

Qəlbimin kamanı dinmədi, dinməz

Ən gözəl şərqilər çalar durmadan.
Özüm çəkib getsəm, ismim silinməz
Şerim danışacaq hər an susmadan.

Mən cahana gəldim gözəllik üçün,
Dağları, çayları seyr etmək üçün.
Xainlik, əclaflıq kənar duracaq
Ürəyim sevgiylə daim vuracaq.

Nə yaxşı doğmusan məni, ay Ana,
Nə yaxşı bax bu cür yetişdirmisən.
Mal, mülk bir yanadır, qəlbim bir yana
Əsas İnsanlığı sən sevdirmisən.

İKİ EŞQ

Bir qəlbə iki eşq sığa bilərmi?

Yaşatmaq mümkünmü iki sevdanı?

Nifrət edən zaman insan sevərmi?

Unutdurar eşqi bütün cahanı...

Qəlbimin qapısı kilidli qalıb,

Ruhum açarını atıb dəryaya...

İki eşq ruhumu fəryada  salıb,

Biçarə ürəyim düşüb bəlaya...